Cafodd Mess Up The Mess ei gydnabod am ein theatr a’n prosiectau ieuenctid rheolaidd. Mae pobl ifanc yn ymarfer amrywiaeth o sgiliau drama creadigol, yn datblygu eu hunan-barch a’u hyder, yn lleisio’u barn a’u profiadau ac yn gwneud ffrindiau newydd, mewn amgylchedd diogel a chefnogol. Mae llawer o bobl ifanc yn mynd ymlaen i gymryd rhan mewn cynyrchiadau ac yn ymuno â phrosiectau eraill Mess Up The Mess.

Mae un o’n cyn-fyfyrwyr, Cerian Wilshire-Davies, yn esbonio:

‘Wrth dyfu i fyny yng nghefn gwlad, ac yn dod o deulu dosbarth gweithiol, prin iawn oedd y cyfleoedd i bobl ifanc gymryd rhan mewn unrhyw beth tu allan i grwpiau chwaraeon, a dosbarthiadau am dâl. Roeddwn i’n gallu bod yn rhan o Mess Up The Mess am ddim, ac roedd yn lle i fi fagu hyder, gwneud ffrindiau ac ymgysylltu’n greadigol mewn ffyrdd na fyddwn i wedi gallu eu gwneud hebddyn nhw. Fe fues i’n cymryd rhan mewn prosiectau theatr a chelfyddydau di-ri ac roedd hyn wedi fy annog i archwilio fy hunaniaeth a themâu a oedd yn bwysig i fi ac i eraill o ‘nghwmpas i. Roedd MUTM hefyd wedi fy annog ac wedi cynnig hyfforddiant i fi i ddatblygu fy sgiliau hwyluso, trwy ei hyfforddiant Arweinydd Cyfoedion a chyfleoedd i fi gefnogi mewn sesiynau. Ar ôl graddio, roeddwn i wedi gallu gwneud interniaeth gyda MUTM ac mae hyn wedi arwain at gymaint o rolau mewn lleoliadau celfyddydau cymunedol. Rydw i nawr yn bartner i Mess Up The Mess fel Artist Arweiniol ar brosiect Queertawe. Ers ymuno â MUTM fel unigolyn ifanc dros 15 mlynedd yn ôl, mae wedi cael effaith enfawr ar fy mywyd, a fyddwn i ddim lle rydw i nawr hebddyn nhw’

Cafodd cyn-Swyddog Celfyddydau Ieuenctid Mess Up The Mess, Joanne Shackley, ei chydnabod hefyd fel Hwylusydd y Flwyddyn am ei gwaith ar ein prosiect diweddar, Yfory. Gweithiodd Joanne gyda 9 sefydliad partner amrywiol ar draws Cymru, a’u cefnogi i gynhyrchu prosiectau gweithredu cymdeithasol creadigol am yr hyn sy’n bwysig iddyn nhw a’u dyfodol.

Rydyn ni mor falch, ac yn teimlo mor freintiedig, o gael ein cydnabod ochr yn ochr â sefydliadau, pobl a phrosiectau mor ysbrydolgar. Llongyfarchiadau i bawb a gafodd eu henwebu a phob un a enillodd wobr, gan gynnwys ein ffrindiau People Speak Up, Cwmni Theatr Taking Flight, UCAN Productions, Owen Thomas a Theatr Na nOg. Diolch yn fawr iawn i Get The Chance am ddangos y gwahaniaeth y mae ein holl sefydliadau yn ei wneud, ac i Porter’s Caerdydd am gynnal digwyddiad mor brydferth.